ബ്രിട്ടന്റെ പുതിയ പ്രധാനമന്ത്രിയെ കാത്തിരിക്കുന്നത്

0


ബ്രിട്ടന്റെ പുതിയ പ്രധാനമന്ത്രി ബോറിസ് ജോണ്‍സ് ആയാലും ജെറമി ഹണ്ട് ആയാലും കാത്തിരിക്കുന്നത് ചില്ലറ വെല്ലുവിളികള്‍ അല്ല. ബ്രെക്‌സിറ്റില്‍ തീരുമാനമുണ്ടാക്കുക മാത്രമായിരിക്കില്ല പുതിയ പ്രധാനമന്ത്രിക്ക് നേരിടേണ്ടിവരിക. ബ്രെക്‌സിറ്റിലെ അനിശ്ചിതാവസ്ഥയാണ് തെരെസ മേയെ രാജിയിലെക്ക് നയിച്ചതെങ്കില്‍ പുതിയ നേതാവിനെ കാത്തിരിക്കുന്ന ആദ്യ വെല്ലുവിളി എണ്ണകപ്പല്‍ പ്രതിസന്ധിയാണ്.


ഇറാനെതിരെ നീങ്ങാന്‍ അന്താരാഷ്ട്ര സഹകരണം തേടുന്ന ബ്രിട്ടന് സാഹചര്യങ്ങള്‍ അനുകൂലമല്ല. ബ്രെക്‌സിറ്റ് കരാറിന് പിന്നാലെ യൂറോപ്യന്‍ യൂണിനുമായുള്ള ബ്രിട്ടന്റെ ബന്ധം അത്ര നല്ലതല്ല, ആണവ കരാറും ബ്രിട്ടീഷ് അംബാസിഡററുടെ ഇ മെയില്‍ വിവാദം വരുത്തി വെച്ച അമേരിക്കയുടെ അനിഷ്ടവും കാര്യങ്ങള്‍ കൂടുതല്‍ ദുഷ്‌കരമാക്കുമെന്ന് ഉറപ്പാണ്.
പാര്‍ട്ടിക്കുള്ളില്‍ പോലും പുതിയ പ്രധാനമന്ത്രിക്ക് പ്രതിസന്ധികള്‍ നേരിടേണ്ടിവരും. എണ്ണകപ്പല്‍ പിടികൂടാന്‍ ഇറാന് അവസരം ഒരുക്കിയതും കപ്പല്‍ മോചിപ്പിക്കാന്‍ വേണ്ട ഇടപെടല്‍ നടത്താത്തതും എംപിമാരില്‍ പോലും അസ്വസ്ഥത ഉണ്ടാക്കിയിട്ടുണ്ട്.
പ്രധാനമന്ത്രിയാവാന്‍ കൂടുതല്‍ സാധ്യതയുള്ള ബോറിസ് ജോണ്‍സിനോട് പാര്‍ട്ടിക്കുള്ളില്‍ തന്നെ എതിര്‍പ്പുകളുള്ളവര്‍ ഉണ്ട്. ബോറിസ് പ്രധാനമന്ത്രിയാകുന്നതു കാത്തു നില്‍ക്കാതെ ധനമന്ത്രിയടക്കം രാജിവെച്ചൊഴിഞ്ഞു. പ്രതിപക്ഷവും ശക്തരാണ്.
പ്രധാനമന്ത്രിയായി ബോറിസ് എത്തിയാല്‍ ഉടന്‍ അവിശ്വാസ പ്രമേയം നല്‍കാന്‍ ഒരുങ്ങി നില്‍ക്കുന്ന പ്രതിപക്ഷവുമായി സഹകരിക്കാന്‍ കണ്‍സര്‍വേറ്റീവ് പാര്‍ട്ടിയിലെ ചില അംഗങ്ങള്‍ എങ്കിലും തയ്യാറായാല്‍ ബോറീസിന്റെ നിലനില്‍പ്പ് ആശങ്കയിലാകും.14 ദിവസത്തിനുള്ളില്‍ വിശ്വാസം തെളിയിച്ചില്ലെങ്കില്‍ പിന്നെ സര്‍ക്കാര്‍ താഴെ വിഴും. ശേഷം വീണ്ടും തെരഞ്ഞെടുപ്പായിരിക്കും.

- Advertisement -