വിദേശയാത്ര നടത്തണമെങ്കില്‍ നരേഷ് ഗോയല്‍ 18,000 കോടിരൂപ ബാങ്ക് ഗ്യാരണ്ടി നല്‍കണമെന്ന് കോടതി

0

കടക്കെണിയിലായി പ്രവര്‍ത്തനം നിര്‍ത്തിയ ജെറ്റ് എയര്‍വെയ്‌സ് പ്രൊമോട്ടോര്‍ നരേഷ് ഗോയല്‍ വിദേശയാത്ര നടത്തുന്നത് തടഞ്ഞ് ഡല്‍ഹി ഹൈക്കോടതി. ഇന്ത്യയ്ക്ക് പുറത്ത് യാത്ര ചെയ്യണമെങ്കില്‍ 18,000 കോടിരൂപ ബാങ്ക് ഗ്യാരണ്ടി നല്‍കണമെന്നാണ് കോടതി ആവശ്യപ്പെട്ടിരിക്കുന്നത്.

ദുബായ് യാത്രയ്ക്ക് വേണ്ടിയാണ് ഗോയല്‍ അനുമതി ചോദിച്ചത്. ഇത് കോടതി നിരാകരിച്ചു. ആര്‍ടിജിഎസ് ഉപയോഗിച്ച് പണം ട്രാന്‍സ്ഫര്‍ ചെയ്യാന്‍ കഴിയുന്നില്ലെന്നും അതിനാല്‍ നേരിട്ട് പണം ശരിയാക്കാന്‍ ദുബായ് വരെ പോകണമെന്നുമായിരുന്നു ഗോയലിന്റെ അപേക്ഷ.

കഴിഞ്ഞ മെയ് 25ന് ദുബായ് യാത്ര ചെയ്യാന്‍ ശ്രമിക്കവെ ഗോയലിനെയും ഭാര്യ അനിതയെയും വിമാനത്താവളത്തില്‍ തടഞ്ഞിരുന്നു. ഇരുവര്‍ക്കും എതിരെ ലുക്കൗട്ട് നോട്ടീസ് ഉണ്ടെന്നാണ് പോലീസ് അവകാശപ്പെടുന്നത്.

പ്രവാസി ഇന്ത്യക്കാരനായ ഗോയലിന് യുകെ, യുഎഇ എന്നിവിടങ്ങളില്‍ വസതികളുണ്ട്. ഇന്ത്യയില്‍ നിന്ന് ഇയാള്‍ പുറത്തുകടന്നാല്‍ തിരികെ എത്തില്ലെന്ന ഭയമാണ് ഇന്ത്യന്‍ ഏജന്‍സികളുടെ കടുംപിടിത്തത്തിന് കാരണം. കടുത്ത സാമ്പത്തിക പ്രതിസന്ധിയില്‍ ആയിരുന്ന ജെറ്റ് എയര്‍വെയ്‌സ് ഏപ്രില്‍ 17ന് സര്‍വ്വീസുകള്‍ അവസാനിപ്പിച്ചിരുന്നു.

ഏകദേശം 8000 കോടിരൂപയ്ക്ക് മുകളിലാണ് ജെറ്റ് എയര്‍വെയ്‌സിന്റെ കടം. വിമാനക്കമ്പനി പ്രവര്‍ത്തനം അവസാനിപ്പിച്ചതോടെ 16,000ത്തിന് മുകളില്‍ വരുന്ന ജെറ്റ് എയര്‍വെയ്‌സ് ജീവനക്കാര്‍ക്കും ജോലി നഷ്ടമായി.

ഇന്ത്യന്‍ വിമാനക്കമ്പനിയായിരുന്ന ജെറ്റ് എയര്‍വെയ്‌സ് 26 വര്‍ഷമായി ഇന്ത്യയുടെ ആകാശത്തുണ്ട്. കടുത്ത സാമ്പത്തിക പ്രതിസന്ധിയെ തുടര്‍ന്ന് സ്ഥാപക ചെയര്‍മാന്‍ കൂടിയായ നരേഷ് ഗോയല്‍ ബോര്‍ഡ് അംഗത്വം രാജിവച്ച് കമ്പനിയില്‍ നിന്ന് പുറത്തുപോയിരുന്നു.

- Advertisement -