മണ്ണിനടിയില്‍ ഇപ്പോഴും 33 പേര്‍; കവളപ്പാറയിലും പുത്തുമലയിലും തിരച്ചില്‍ തുടരും

0

കേരളത്തില്‍ കഴിഞ്ഞദിവസങ്ങളില്‍ ഏറ്റവും ശക്തമായി ഉരുള്‍പ്പൊട്ടല്‍ നടന്ന നിലമ്പൂര്‍ കവളപ്പാറയിലും വയനാട് പുത്തുമലയിലും വെള്ളിയാഴ്ചയും തിരച്ചില്‍ തുടരും.

വയനാട് പുത്തുമല ഉരുള്‍പൊട്ടലില്‍ കാണാതായവര്‍ക്ക് വേണ്ടിയുള്ള തെരച്ചില്‍ ഇന്നും തുടരും. ഇതിനകം പ്രദേശത്ത് നിന്ന് 10 മൃതദേഹങ്ങള്‍ കണ്ടെത്തിയിരുന്നു. എന്നാല്‍ ഒരാഴ്ച പിന്നിട്ടിട്ടും മറ്റ് ഏഴു പേരെ കണ്ടെത്താന്‍ സാധിച്ചിട്ടില്ല. ഒരാഴ്ച മുന്‍പുണ്ടായ ദുരന്തത്തില്‍ കാണാതായ 7 പേര്‍ക്ക് വേണ്ടിയാണ് പുത്തുമലയില്‍ ഇന്നും തെരച്ചില്‍ നടക്കുന്നത്.

ഉരുള്‍പൊട്ടല്‍ വന്‍ദുരന്തം വിതച്ച നിലമ്ബൂര്‍ കവളപ്പാറയില്‍ കാണാതായവര്‍ക്കായുള്ള തെരച്ചില്‍ രാവിലെ ഏഴരയോടെ തുടങ്ങും.
നൂറു കണക്കിന് സന്നദ്ധ സേവകരും മണ്ണ് മാന്തി യന്ത്രങ്ങളുപയോഗിച്ച് കിണഞ്ഞ് ശ്രമിച്ചിട്ടും കഴിഞ്ഞ 4 ദിവസത്തെ തിരച്ചില്‍ വിഫലമാവുകയായിരുന്നു. അനുകൂല കാലാവസ്ഥയായിരുന്നിട്ടും കഴിഞ്ഞ ദിവസത്തെ തെരച്ചിലിലും ആരെയും കണ്ടെത്താനായില്ല. സ്‌നിഫര്‍ ഡോഗുകളെയെത്തിച്ച് നടത്തിയ തെരച്ചില്‍ ആദ്യദിനം ഫലം കണ്ടില്ലെങ്കിലും ഇന്നു വീണ്ടും ദൗത്യം തുടരും. കാണാതായവരുടെ ബന്ധുക്കളുമായി നടത്തിയ ചര്‍ച്ചക്ക് ശേഷവും മണ്ണുമാന്തി യന്ത്രമുപയോഗിച്ചുള്ള തെരച്ചില്‍ തുടരാന്‍ തന്നെയാണ് തീരുമാനിച്ചത്.

കവളപ്പാറയില്‍ മണ്ണിനടിയില്‍ പെട്ടവരെ കണ്ടെത്താനുള്ള ശ്രമം ഒരാഴ്ച പിന്നിടുകയാണ്. ഇന്നലെ 3 മൃതദേഹങ്ങള്‍ കൂടി പുറത്തെടുത്തതോടെ ആകെ കണ്ടെടുത്തവരുടെ എണ്ണം 33 ആയി. ഇനി 26 പേരെ കൂടി കണ്ടെത്താനുണ്ട്. ഇപ്പോള്‍ ലഭിക്കുന്ന മൃതദേഹങ്ങള്‍ അഴുകിയ നിലയിലാണെങ്കിലും എല്ലാവരെയും തിരിച്ചറിയാനായി .

കാലാവസ്ഥ അനുകൂലമാണെങ്കില്‍ ഇന്നും കൂടുതല്‍ മൃതദേഹങ്ങള്‍ പുറത്തെടുക്കാനാവുമെന്നാണ് പ്രതീക്ഷ.

- Advertisement -