• തിങ്കൾ. മാര്‍ 4th, 2024

നായിക സങ്കൽപ്പങ്ങളെ തിരുത്തിയെഴുതിയ നടി! സായ് പല്ലവി വിസ്മയിപ്പിച്ച അഞ്ച് കഥാപാത്രങ്ങൾ

സാമ്പ്രദായികമായി തുടർന്നു പോകുന്ന സങ്കൽപ്പങ്ങളെ പൊളിച്ചെഴുതുകയെന്നത് ചിലരേക്കൊണ്ട് മാത്രം സാധിക്കുന്ന കാര്യമാണ്. അത്തരത്തിൽ സിനിമയിലെ നായിക സങ്കൽപ്പങ്ങളെ മുഴുവൻ അപ്പാടെ മാറ്റിപറയിച്ച നായികമാരിലൊരാളാണ് സായ് പല്ലവി (sai pallavi). മേക്കപ്പൊന്നുമില്ലാതെ മുഖം നിറയെ കുരുക്കളുമായി എത്തിയ സായ് പല്ലവി എന്ന നായിക ഒരു ചെറു ചിരിയോടെ നടന്നു കയറിയത് തെന്നിന്ത്യൻ സിനിമ പ്രേക്ഷകരുടെയെല്ലാം ഹൃദയത്തിലേക്ക് കൂടിയാണ്. ഒരുപക്ഷേ സ്വന്തം പേരിനേക്കാൾ മലർ എന്ന കഥാപാത്രമായാണ് താരം പ്രേക്ഷകരുടെ മനസിലുള്ളത്. അടുത്ത വീട്ടിലെ പെൺകുട്ടിയോടുള്ള ഒരിഷ്ടം സായ് പല്ലവിയോട് മലയാളികൾക്ക് എപ്പോഴുമുണ്ട്. അത് തന്നെയാണ് താരത്തിന്റേതായി പുറത്തുവരുന്ന ഓരോ വാർത്തയും മലയാളികൾ നെഞ്ചോടു ചേർക്കുന്നതിന് കാരണവും. മനോഹരമായ പുഞ്ചിരിയും ചീകിയൊതുക്കാത്ത നീണ്ടമുടിയും അസാമാന്യമായ നൃത്തച്ചുവടുകളുമെല്ലാം സായ് പല്ലവിയോടുള്ള പ്രേക്ഷകരുടെ ഇഷ്ടം കൂട്ടി. പ്രിയതാരത്തിന്റെ കരിയറിലെ അ‍ഞ്ച് മികച്ച കഥാപാത്രങ്ങളെ പരിചയപ്പെടാം.

അൽഫോൻസ് പുത്രൻ സംവിധാനം ചെയ്ത പ്രേമത്തിൽ മലർ എന്ന അധ്യാപികയായാണ് സായ് പല്ലവിയെത്തിയത്. ഒരു നായിക എങ്ങനെയായിരിക്കണമെന്ന സങ്കൽപ്പം ഈ കഥാപാത്രത്തിലൂടെ സായ് പല്ലവി പൊളിച്ചെഴുതി. ആദ്യ ചിത്രമായിട്ടു കൂടി വളരെ സ്വാഭാവികമായാണ് സായ് പല്ലവി ചിത്രത്തിൽ തന്റെ രം​ഗങ്ങൾ അഭിനയിച്ചത്. നിവിൻ പോളിയായിരുന്നു ചിത്രത്തിൽ നായകനായെത്തിയത്. മൂന്ന് നായികമാരായിരുന്നു ചിത്രത്തിലുണ്ടായിരുന്നത്. അനുപമ പരമേശ്വരൻ, മഡോണ സെബാസ്റ്റ്യൻ എന്നിവരായിരുന്നു മറ്റു നായികമാർ. ജോർജ് എന്ന നിവിൻ പോളിയുടെ കഥാപാത്രത്തിന് മലർ മിസിനോട് തോന്നുന്ന പ്രണയമാണ് ചിത്രത്തിന്റെ ഇതിവൃത്തം. ചിത്രത്തിലെ കഥാപാത്രത്തിന് സായ് പല്ലവിയെ തേടി നിരവധി പ്രശംസകളുമെത്തി.

2016 ൽ പുറത്തിറങ്ങിയ ചിത്രം സംവിധാനം ചെയ്തത് സമീർ താഹിറായിരുന്നു. സായ് പല്ലവിയുടെ രണ്ടാമത്തെ ചിത്രമായിരുന്നു കലി. പഠനത്തിൽ നിന്ന് ഒരു മാസത്തെ ഇടവേള എടുത്താണ് താരം കലിയിൽ അഭിനയിച്ചത്. വളരെ ദേഷ്യക്കാരനായ സിദ്ധാർഥ് (ദുൽഖർ സൽമാൻ) എന്ന കഥാപാത്രത്തെ വിവാഹം കഴിക്കുന്ന അഞ്ജലി എന്ന പെൺകുട്ടിയുടെ വേഷത്തിലാണ് സായ് പല്ലവി ചിത്രത്തിലെത്തിയത്. അഭിനേത്രി എന്ന നിലയിൽ സായ് പല്ലവിയുടെ കഴിവ് ഒരിക്കൽ കൂടി പ്രേക്ഷകർ കണ്ട ചിത്രമായിരുന്നു കലി.

2020 ൽ നെറ്റ്ഫ്ലിക്സിലൂടെ പുറത്തിറങ്ങിയ ഒരു ആന്തോളജിയാണ് പാവ കഥൈകൾ. വെട്രിമാരൻ സംവിധാനം ചെയ്ത ഊർ ഇരവ് എന്ന കഥയിലാണ് സായ് പല്ലവിയെത്തിയത്. സുമതി എന്ന കഥാപാത്രത്തെയാണ് സായി പല്ലവി അവതരിപ്പിച്ചത്. താഴ്ന്ന ജാതിയിൽപ്പെട്ട ഹരി കൃഷ്ണൻ എന്ന യുവാവിനൊപ്പം ഒളിച്ചോടി വിവാഹം കഴിക്കുന്ന സുമതി നാളുകൾക്ക് ശേഷം വീട്ടിലേക്ക് തിരികെയെത്തുകയാണ്. ദുരഭിമാനക്കാരനായ അച്ഛനിൽ നിന്ന് സുമതിയ്ക്ക് നേരിടേണ്ടി വരുന്ന കാര്യങ്ങളാണ് ചിത്രം പറയുന്നത്. ഊർ ഇരവ് കണ്ട് കണ്ണ് നിറയാത്തവരായി ആരും തന്നെയുണ്ടാകില്ല. സുമതിയുടെ ഓരോ ഭാവങ്ങളും അതി​ഗംഭീരമായാണ് സായ് പല്ലവി അവതരിപ്പിച്ചത്.